Að halda eftir greiðslu vegna galla á fasteign
- www.opus.is :
- Forsíða ->
- Lagapunktar - Fréttabréf ->
- September 2016 ->
- Að halda eftir greiðslu vegna galla á fasteign
Í fasteignakaupum kemur sú staða gjarnan upp að kaupandi,
sem á eftir að greiða seljanda kaupverðið að fullu, finnur eitthvað
sem hann telur vera galla á fasteigninni. Áður en komið er að
lokagreiðslu og afsali stendur kaupandi þannig oft frammi fyrir því
hvort hann eigi að halda eftir hluta kaupverðsins vegna hins
mögulega galla. Tilgangur þess að halda eftir greiðslu er þá
yfirleitt sá að reyna að tryggja þann afslátt sem kaupandinn telur
sig eiga rétt á eða knýja á um úrbætur.
Í lögum um fasteignakaup er kveðið á um rétt kaupanda að
þessu leyti. Þar segir að hafi kaupandi uppi réttmæta kröfu vegna
galla þá geti hann á eigin áhættu haldið eftir svo miklum hluta
kaupverðs sem nægir til að tryggja greiðslu hennar. Kaupanda getur
m.ö.o. verið heimilt að halda eftir þeim hluta kaupverðsins sem
svarar til tjóns hans vegna gallans, auk vaxta og
kostnaðar.
Um þetta verður kaupandi þó eðlilega að gæta varúðar. Ef
hann heldur ranglega eftir greiðslu eða ef hann heldur eftir of
miklu, þá getur það skapað seljanda rétt til vanefndarúrræða
gagnvart kaupanda. Þannig getur seljandi átt rétt á dráttarvöxtum
vegna þeirrar fjárhæðar sem kaupandi hélt eftir umfram það sem
honum var heimilt. Ef vanefnd kaupanda telst veruleg getur það svo
jafnvel skapað seljanda riftunarrétt.
Vegna þessa er mikilvægt að kaupandi beiti haldi á greiðslu
aðeins af vandvirkni og reyni umfram allt að tryggja sér sönnun um
gallann, réttmæti kröfu sinnar og þá fjárhæð sem honum er heimilt
að halda eftir. Það gerir kaupandi yfirleitt best með því að afla
sem fyrst sannfærandi gagna máli sínu til stuðnings. Hér er einkum
átt við það að afla mats sérfræðings, t.d. verkfræðings eða
húsasmiðs, á orsökum hins meinta galla og kostnaði við úrbætur.
Þannig leitast kaupandi við að sýna fram á tjón sitt og hve háa
fjárhæð honum er heimilt að halda eftir og dregur um leið úr líkum
á því að hald hans á greiðslu komi honum í koll.
Deilur í fasteignakaupum, svo sem varðandi galla, afslátt og
hald á greiðslu, geta verið flóknar og aðstoð lögmanna oft
nauðsynleg. OPUS lögmenn hafa langa reynslu af hagsmunagæslu í
slíkum málum bæði fyrir kaupendur og seljendur. Nánari upplýsingar
í þeim efnum veita Erlendur Þór Gunnarsson
hrl. og Bjarni Þór Sigurbjörnsson
hdl. í síma 415-2200 eða í gegnum [email protected] og [email protected].